Últimas novedades

Día Internacional de la Llingua materna

El próximu 21 de Febreru l´IES Víctor García de la Concha celebra´l día Internacional de la Llingua Materna. Esti día fue proclamáu pola UNESCO el 21 de Febreru del 2000 y celébrase en tol mundu pa promover la diversidá llingüística y cultural y el plurillingüismu.

L´institutu va organizar delles actividaes: presentación del material de La Güerta n´Asturianu, esposición de carteles sobre la Historia de la Llingua Asturiana, y una charra-conciertu con miembros de dellos grupos asturianos.

• El material de La Güerta n´Asturianu sedrá presentáu pol encargáu del Serviciu de Normalización Llingüística de la Comarca de la Sidra y va usase nel proyectu del centru de Güertos Escolares.
• Espondránse una riestra carteles sobre la Historia de la Llingua Asturiana que sedrá cedida temporalmente pol SNLL de la Comarca la Sidra.
• Como actividá final, tendremos una Charra-Conciertu. La charra va dala Xandru de Skama la Rede, y el conciertu va ser del grupu maliayu Melandru.

Skama la Rede

Melandru

Serviciu Normalización Llingüística de la Comunidá de la Sidra

La celebración del díi la Llingua materna nel IES Víctor de la Concha entamó cola presentación del Calendariu de la Güerta por parte del Serviciu de Normalización Llingüística de la Mancomunidá de la Sidra. La presentación fízose con alumnáu de Terceru la ESO del programa PMAR que participen nun proyectu de Güertos Escolares. Asistieron dellos medios de comunicación y la Teniente Alcalde de la casa conceyu Villaviciosa. Darréu averámonos al güertu del centru onde pudimos ver los avances de los estudiantes nel proyectu.

Como segunda actividá, inauguramos una esposición de paneles sobre la Historia de la Llingua y Lliteratura Asturianes, esta esposición permanecerá nel centru una temporadina colo que tol alumnáu tendrá la oportunidá de echa-y una güeyada.

Como tercera y cabera actividá, tol alumnáu de primeru bachilleratu y terceru y cuartu d´ESO asistieron nel salón d´actos a una charra-conciertu.

Abrimos l´actividá cola llectura del manifiestu del díi la llingua materna de la Conseyería d´Educación. Dellos alumnos de terceru la ESO lleeron el manifiestu, y darréu compartieron con nós dos pallabres n´asturianu, una pallabra qu´ellos usen davezu y que-yos presta, y una pallabra de llugar, topónimu, que significa daqué importante pa ellos.

Xandru Vega, gaiteru de Skama la Rede, fizo un resumen de la Historia de la música rock n´asturianu, mostrando vídeos al alumnáu dende lo más primitivo a lo más moderno.

Por último, el grupu maliayu de post rock n´asturianu Melandru dio un conciertu entusiasmando al alumnáu.