Últimas novedades

Entrega de premios del Primer Concursu de Microrrellatos n´Asturianu

El martes 9 de Mayu a les 18:30 hores tuvo llugar la entrega de premios del concursu nuna intensa tarde cultural n´asturianu.

Dientro la celebración de la Selmana les Lletres Asturianes, l´ayuntamientu de Villaviciosa en collaboración col Serviciu de Normalización llingüística de la Comarca la Sidra, la Compaña del Ronchel y l´IES Víctor García de la Concha, entamaron el conciertu d´“Ún de Grao”, la presentación de la revista Frúiz, y la entrega de premios del Primer Concursu de Microrellatos n´Asturianu.

Al actu asistió abondosu públicu de toles edaes que disfrutó d´estes actividaes.

 

Primer Concursu de Microrrelatos

38 Selmana de les Lletres Asturianes 2017

Fallu de los xuraos

Primaria

Xuráu compuestu poles alumnes de la materia de Lliteratura Universal (1º Bachilleratu) Candela Alonso, Lucía Cueli, Lorena Espiña, Lucía Estrada, Lucía Poladura, Claudia Valle y Jimena Villazón.

1.- Llucía                                                       Paula Somoano Mieres (CP Maliayo)

2.- Un buen sustu    (Guepardo)               Pablo Fernández Moreno (C. San Rafael)

3.- La gallina Kika                                        Daniela Palacio Fernández (C. San Rafael)

4.- María ya la inimaxinable bisarma        Eva Vázquez de Prada Rodríguez (C. San Rafael)

5.- La cullebrina                                           Alba Domínguez Patallo (CP Maliayo)

 

Secundaria

Xuráu compuestu polos escritores n’asturiano Lluis Portal, miembru de la Compaña del Ronchel, y Pablo Suárez, responsable del Serviciu de Normalización Llingüística de la Comarca de la Sidra.

1.- Málaga, a 7 de febrero Juan Villazón Vallina (IES V. García de la Concha)
2.- El viaxe pendiente(La fuína)Miguel Serrano Prieto (IES V. García de la Concha)
3.- Vistíos de Chanel(Serina)Jimena Villazón Busta (IES V. García de la Concha)
4.- Na llibrería(Sandra)Covadonga García Prida (C. San Rafael)
5.- Vengación navidiega(Kira)Naiara Vallín Gancedo ( C. San Rafael)

 

Profesoráu

 

Xuráu compuestu polos profesores del IES Víctor García de la Concha, Miguel Rojo y Ángel Valle.

 

1.- Secretu                                                    Marta García Valdés (IES Víctor García de la Concha)

 

2.- ¡Mañana!                                                 José Luis Agüera Boves (IES V. García de la Concha)

Families

1.- Emboscada                                             Rubén Delgado Vázquez (IES V. García de la Concha)

 

2.- Naturaleza viva                                      Marta Montes Samartino (IES VGC / CP Maliayo)

 

sin-titulo6 sin-titulo7 sin-titulo8

Los trabayos premiaos fueren los que siguin darréu:

 Categoría Primaria: Paula Somoano Mieres

 Llucía

Yérase una guaja perguapa que vivía colos güelos. Como yeren probes, dempués del colexu diba tolos díes a la viesca a buscar setes pa poder mercales na plaza; asina ganaben unes perruques.

Los collacios reíense d’ella, toos menos Lluisín, que yera mui buenu y veía lo que tenía que trabayar Llucía, qu’asina se llamaba la neña.

Cuando podía, Lluisín acompañábala porque xuntos garraben más y primeru, y asina podíen xugar un pocu.

Un día adientráronse muncho na viesca y atoparon un claru perguapu enllenu flores y con una fonte. Na fonte taba una xana llorando; ellos teníen munchu miéu, pero acercáronse y entrugaron-y que qué-y pasaba. La xana contó-yos la so hestoria. Taba siempre vixilada por un cuélebre que nun la dexaba en paz.

Los guajes ayudaron a la xana a desfacese del cuélebre. Aprovecharon a tapiar la entrá de la cueva con una piedrona xigante mientres él echaba un pigazu. La xana, agradecía, dio-y a Llucía un puñáu de monedes d’oru.

Dende esi día, na casa de Llucía viven un pocu meyor. Pero Llucía sigue yendo con Lluisín a garrar setes porque asina aprende que ye perimportante trabayar y colaborar nes tarees de la casa.

 

Categoría Secundaria/Bachilleratu: Juan Villazón Vallina

 Málaga, a siete de febreru.

Güei salimos de paseo tola familia. Mio ma diz que nos dexaron participar nun gran desfile. Una pasada. Hai xente perdayuri, con unes maletes enormes, pero fálase sele y poco.

Ye 7 febreru y ya llevamos un día enteru caminando. Dicen qu’entá queda muncho Duélenme los pies, pero papá afálame pa que siga. Tando con elli nun m’importa tantu’l cansanciu. Les vistes son perguapes: la mar de un llau y unos olivares enormes del otru.

Nun fui al colexu y dame cosa poles amigues. Amás, escaecióseme’l peluche de la suerte. Miro pa mio má y dizme “pocu ya, cielín, pocu”, ensin tener qu’entruga-y lo que falta pa tornar pa en casa.

Pasé fríu enforma pela nueche, pero ya tamos caminando dende bien ceo. De sópitu, sentí unos ruíos terribles. ¡Buuuuum, buuuuuuum! Papá garróme y tiróme pa un furacu na cuneta. Yo tenía tantu miéu que zarré los güeyos. Cuando pasó tou, abrílos. Ya nun había desfile. La xente al mio rodiu taba durmiendo. Unos metanes la carretera, otros más lloñe, pente los olivos. Dellos col cuerpo pa un llau y les piernes o la tiesta pa otru. N’atopando a papá y a mamá tienen que desplicame cómu se fai eso.

P.D. El día 8 de febrero de 1937, la carretera de Málaga a Almería foi bombardiada poles tropes franquistes. Morrieron ente 3000 y 5000 civiles que fuxíen camín d’Almería, tovía embaxo’l control republicanu

 

Categoría Profesoráu: Marta García Valdés

 Secretu

Tardo muncho en dormecer y siempres m´asalten espantibles pesadielles. Desearía que fuere de día y ella me xuxuriare cola so duce voz. Ye maravillosu´l secretu que compartimos, del que naide debe enterase: esi poder sobre les pallabres que dalgún día herediaré. Si diz: “¡Llavadora!”, la cocina ponse a xirar como la noria nel Parque d´atracciones. Otres vegaes diz: “¡Llave!”, y tolo malo quédase guardao nel someráu. Cuando-y oyemos aportar, ella diz: “¡Colesterol!” y les coses tornen al so sitiu como si nada. Mama ta practicando con una nueva pallabra. Un día d´estos dirá: “¡Páxaru!”, y los dos, a la fin, podremos salir esnalando pela ventana, y afuxir.

 

Categoría Madres/Padres: Rubén Delgado Vázquez

La Emboscada

Dábame’l sol nel focicu, taba incómodu, pero diba a bon pasu. Veníenme perbién una filera cipreses a la drecha del camín; oyí un ruíu conocíu averándose, de momentu encoyíme escontra unes piedres… colos aviones nun se sabe enxamás. Quedé perquietu un momentu por precuru. Arrastréme, superé dos pasos ente finques y arrodié pol ríu pa nun veme espuestu. En dexando a salvo les melecines, merendar y recoyer unos güevos, disponíame a tornar. La mio güela cuntábame daqué sobre’l Facebook, pero diba un ratu que los mios pensamientos taben en cómo llegar sanu y salvu y nun cayer nuna emboscada.

Deja un comentario

Tu dirección de correo electrónico no será publicada. Los campos obligatorios están marcados con *