Ganadores del concursu «El mío cantar»
La clase de llingua asturiana de 1u d’ESO ganamos nel concursu «El mio cantar» con un tema contra’l maltratu machista
Los alumnos y les alumnes que cursamos Llingua asturiana y Lliteratura en 1u ESO nel IES Víctor García de la Concha ganamos nel concursu “El mio cantar” con un tema compuestu por nós. El Serviciu de Normalización Llingüística de la Comarca de la Sidra, xunto con otros servicios del territoriu, convocaron un concursu de creación de cantares pal alumnáu de 4u, 5u y 6u de Primaria y 1u y 2u d’ESO pa fomentar l’usu del asturianu nos centros escolares. El premiu ye que’l nuestru cantar va grabalu un grupu de música reconocíu y va formar parte d’un cd xunto con otros cantares ganadores.
Desque la Mancomunidá de la Comarca de la Sidra, en comuña cola Rede de Normalización Llingüística nos Conceyos, dio anuncia de la convocatoria del concursu n’ochobre, escomenzamos a trabayar. De mano, poniéndonos d’alcuerdu sobre’l tema que queríemos tratar y que, cuasi por unanimidá, dedicimos escribir sobre’l machismu. De siguío, analizamos la estructura y el ritmu de los cantares de hip-hop y rap y, con ello, aprendimos dellos conceptos básicos como: ritmu, rima, versu, estrofa, comparanza, metáfora, personificación, etc. Darréu, inspirámonos escuchando dellos temes de trap feminista n’otres llingües y dalgunos alumnos truxeron a clase propuestes de bases musicales pal nuestru cantar. Pa rematar, concretamos el tema del machismu na violencia contra les muyeres porque xusto naquellos díes yera -por desgracia- un tema d’actualidá y teníemos muncho que dicir. Agora yá, por fin, podíemos ponenos a escribir: en pareyes fuimos creando estrofes, que depués iguaron les otres pareyes. Na siguiente clase montamos el cantar y punxímos-y títulu. Solo nos quedaba lo más difícil: cantar. Gracies al móvil d’una compañera, al flow d’un compañeru y al bon facer de tola clase llogramos grabar «¡Vaya sociedá». Esperamos que vos preste.
Iyán, Alexia, Víctor, Pablo, Eneko, Daniel, Teresa, Josué, Kevin, Paula, Kevin A., Enmanuel, Nayín, Raúl, Daniela, Margarita, Lucía y Wanting.
¡VAYA SOCIEDÁ!
Cuasi cien muyeres muertes al añu
por culpa l’home y el maltratu
más amor y menos muertes
somos muyeres, ¡non al maltratu!
Duelme la barriga pero tengo que llimpiar
a él cuando-y duel pue descansar
Ta permal esta sociedá
Machismu, maltratu, ¡qué mal!
Pantalón llargu van chistate igual
Piropos, xiblíos, ¡qué más da!
Les muyeres nun tamos tranquiles
vamos pela calle y siempre nos vixilen
Cuasi cien muyeres muertes al añu
por culpa l’home y el maltratu
más amor y menos muertes
somos muyeres, ¡non al maltratu!
Esi día tovía nun te conocía
tu tan tuyu y yo tan mía
entrasti pela puerta d’aquella cafetería
vite y matástime d’amor, ¡qué ironía!
pidisti un café p’amargar los tos llabios.
Dixístime: yá nun me gusta como vistes
tápate un pocu más que te van mirar
cómo vas salir tu de fiesta
sabiendo bien que me molesta
Y vete con esi que t’unvía guasaps
de xuru que yá vos enrollastis cuantayá
porque nun vales pa más ná
Cuasi cien muyeres muertes al añu
por culpa l’home y el maltratu
más amor y menos muertes
somos muyeres, ¡non al maltratu!
A les muyeres trátennos como perros y gatos,
eso ye maltratu
yo quiero un tratu onde los homes ensin corazón
traten a les muyeres como lo que son
y non como robots.
El machismu nun llega a nengún llau
dellos homes tán maleducaos
Porque la muyer nun tien la culpa,
ye la xente que ye inculta.
En mio casa mio madre trabaya
mientres mio padre anda de parranda
Cuasi cien muyeres muertes al añu
por culpa l’home y el maltratu
más amor y menos muertes
somos muyeres, ¡non al maltratu!
